Business is booming.

ሓበሬታ : ናህሪ መልከፍቲ ‘ኮቪድ-19’ን ኣብ መገሻታት ክግበር ዘለዎ ጥንቃቐታትን

ኣብ ማዕከናት ዜና ብቐጻሊ ይጋዋሕ ከምዘሎ፡ ለበዳ ‘ኮቪድ-19’ ኣብ’ዚ ወርሓት’ዚ፡ ኣብ ሓያሎ ሃገራት ናብ ራብዓይ ማዕበል ወይ ደግሲ ዓሪጉ፡ ብዘሰክፍ ናህሪ የስፋሕፍሕ ኣሎ። ቀንዲ ጠንቂ ናይ’ዚ ደግሲ’ዚ፡ ኣብ’ዚ መወዳእታ እዋን ዝማዕበሉ ደልታን – ብፍላይ ኦሚክሮን ዝተሰምየ ልዑል ናይ ምጭጫሕን ምልባዕን ባህሪ ዘለዎ ሓድሽ ጅርን – ኰይኖም፡ እቲ ኣብ ሰሜናዊ ክፋል ዓለም ዘሎ ቆራሪ ወቕቲ’ውን ተወሳኺ ባእታ ብምዃኑ’ዩ።

ከም መርኣያ ናይ’ዚ ድማ፡ ኣብ ዝሓለፈ ሰሙን፡ መጠን መልከፍቲ ብደረጃ ዓለም ብ11% ወሲኹ’ሎ። ብዘይካ’ዚ፡ ኣብ ገለ ሃገራት ኤውሮጳን ኣመሪካን፡ ዕለታዊ ካብ 150 ሽሕ ክሳብ 260 ሽሕ ሓድሽ መልከፍቲ እናተመዝገበ፡ እቲ ጠቕላላ ኣሃዝ ናብ 280 ሚልዮን ተጸጋጊዑ’ሎ።

እዚ ዓለማዊ ኩነታት፡ ኣብ ኤርትራ’ውን ጽልዋ ስለዝህልዎ፡ መጠን መልከፍቲ ብፍላይ ኣብ’ቶም ካብ ወጻኢ ዝኣትዉ ገያሾ፡ ብመጠኑ ክልዕል ትጽቢት ይግበረሉ።

ብሓፈሻ’ውን፡ ዝርግሔ ‘ኮቪድ-19’ ኣብ ሃገርና ኣብ ዝሓለፈ ክልተ ኣዋርሕ ብተዛማዲ ወሲኹ ከምዘሎ ምግንዛብ የድሊ። ኣብ መወዳእታ ዝሓለፈ ወርሒ ሕዳር 7358 ዝነበረ ጠቕላላ ቊጽሪ ብኮሮና ቫይረስ ዝተለኽፉ ዜጋታት፡ ኣብ ውሽጢ ሓደ ወርሒ ብኣስታት 8 ሚእታዊት ዓብዩ’ሎ።

እዚ ስለዝዀነ፡ ሚኒስትሪ ጥዕና፡ ካብ ወጻኢ ናብ ኤርትራ ንዝኣትዉ ዜጋታትን ካልኦት ገያሾን፡ እዚ ዝስዕብ መምርሒ ኣውጺኡ’ሎ፦

  1. ንኹሎም ገያሾ ዝምልከት ናይ ቅድመ-መርመራ ቅጥዕታት፡ ኣብ ቦትኡ’ሎ።
  1. ኤርትራ ምስ ኣተዉ፡ ኣብ ኣህጉራዊ መዓርፎ ነፈርቲ ኣስመራ ብዝግበረሎም መርመራ ብ‘ኮቪድ-19’ ምልካፎም ዝተረጋገጸ ገያሾ፡ ብናታቶም ወጻኢታት፡ ብሚኒስትሪ ጥዕና ኣብ ዝተመርጻ ሆቴላት ከምዝውሸቡ ክግበር’ዩ። ዝርዝር ኣብ መዓርፎ ነፈርቲ ክቕረብ’ዩ።
  1. ህልዊ ኩነታት ኣብ ግምት ብምእታው፡ ኣብ’ዚ ተኣፋፊ ወርሓት ጥሪን ለካቲትን፡ ኣዝዩ ኣገዳሲ እንተዘይኰይኑ፡ ካብን ናብን ኤርትራ ዝግበር መገሻታት፡ ብዝተኻእለ መጠን ንኻልእ እዋን ክሰጋገር ይምረጽ።

ላዕለዋይ ሓይሊ ዕማም

 ምክልኻል ሕማም ኮሮና ቫይረስ

 29 ታሕሳስ 2021

This website uses cookies to improve your experience. We'll assume you're ok with this, but you can opt-out if you wish. Accept Read More